انا سلحفاتى جبتها من حوالى 3 اسابيع هى برمائية من نوع السلاحف ذات الاذن الحمراء بس هى عند اذنها لون برتقالى يعنى انثى :) بس انا كنت سمتها حنفى خلاص :) المهم هى صغيرة اوى طولها 4 سم (ده طول الصدفة بتاعتها فقط من غير راسها ورقبتها وذيلها) فهل كدة مقاسها كويس ولا ايه انا خايفة لاتكون بتعانى من مرض بسبب حجمها الصغير زى ما قريت فى احد المنتديات بس انا مكنتش قريت عنها قبل ما اجيبها فمكنتش عارفة فياريت حد يفيدنى فى النقطة دى ...
حاجة تانية لما جبتها كانت نشيطة اوى وكدة لحد اليوم اللى مش حابة افتكره كنت حطاها جوة الحوض بتاعها ع الارض فى ضوء الشمس عشان تتشمس جنب البلكونة فاختى وهى ماشية ومش خدت بالها من الطبق شاطته برجلها فاتدحرج كذا مرة لحد ما خبط فى الكنبة واتكسر :( جريت على سلحفاتى (حنفى ) وشيلتها لقيتها دخلت كل جسمها جوة الصدفة كانت خايفة المهم وفرتلها طبق صغير كدة لحد ما اجبلها حوض كبير ان شاء الله لان اصلا الطبق اللى هى كانت فيه كان صغير ومكنتش بتاخد راحتها اوى يعنى بس بصيت ع جسمها كله ملقتهاش اتعورت الحمد لله ... بس لاحظت ان نشاطها قل بقت بتنام اغلب اليوم يمكن لان الطبق صغير فحست بالملل وممكن لانها لوحدها مش معاها سلحفاه تانية فحاسة بالاكتئاب المهم بتنام اغلب اليوم بس بتبقى ملهوفة ع الاكل عادى وقعدت يومين للاسف مفيش اخرج بس النهاردة كان فى حالى اخراج الحمد لله بس برضه بتنام اغلب اليوم ايه السبب؟ وهل اوديها لدكتور احسن لحسن يكون جالها شروخ او اى حاجة من الاصطدام ده؟
حاجة تانية بسمع عن تورم العين انا شايفة ان سلحفاتى عينها عادية بالنسبة لى ولما بتقفلها وتنام بيبقى شكلها كانها مكتظة او ورمة بس انا من اول ما جبتها وهى كدة عشان كدة مش قادرة احدد دى عيون طبيعية ولا كدة وارمة .. اعمل ايه عشان اتاكد؟
حاجة تانية انا حطاها فى حوض فى الارضية حاطة ظلط او صخور كدة صغيرة والراجل اللى جبتها منه قالى حطي الصخور ع جنب ومتمليش الحوض مية اوى بحيث تسبح براحتها فى الحتة الفاضية وتبقى قادرة انها ترفع رقبتها فى نفس الوقت وتتنفس هوا لو حبت والصخور خليها ع جنب لو حبت تقعد عليهم لانها مش بتعرف تسبح اوى فمتمليش الحوض مية هو كام سم بس!!!!!!!!! طب ازاى مش هى المفروض برمائية يعنى بتعرف تسبح؟؟ اعمل ايه فى دة؟
حاجة تانية الراجل قالى اكليها من اكل السمك ده هو عبارة عن حبوب مدورة صغيرة ملونة كدة ... قالى اكليها منه بس حوالى 6 حبات بس فى اليوم متزوديش عن كدة لحسن تنتفخ وتموت!!! طب ده صحيح ولا ايه انا شايفة الحبوب دى صغيرة جدا عليها وهى لسة فى مرحلة نمو ... فانا بسال ااكلها قد ايه منهم؟ وكام مرة فى اليوم ؟ لانى بلاحظ انى لما باكلها كل يوم بتبقى هتتجنن ع الاكل كانها جعانة من اليوم اللى قبله وانا للاسف خايفة ازودلها عن الست حبات فتموت زى ما قال؟ وانا مرة اكلتها جزر مبشور الحمد لله فبحاول انوعلها بس حتى الجزر المبشور اكلتها منه بما يعادل ال 6 حبات عشان خفت عليها فهل ده صحيح ولا الحق ازودلها فى الاكل لحسن تموت بعد الشر ؟ وهل لو اكلتها قطع صغيرة فراخ او كدة او حتت سمك صغيرة ممكن تبقى متوحشة بعد كدة وتعض صباعى لو لمستها او شيلتها؟ يعنى اخليها نباتية احسن ولا ايه؟
حاجة تانية انا حطاها فى حوض بنضف ميته مرتين فى اليوم لانها بتاكل فيه وبيتم فيه عملية الاخراج بس اللى قالقنى انها بتنام فيه بالليل واحنا داخلين ع الشتا يعنى ممكن تكون بردانة اعملها ايه فى المية؟ ولا اعملها بيت كرتون فيه قش مثلا انيمها فيه بالليل ولا اعمل ايه؟ وهل لما الشتا يدخل السلحفاه البرمائية بتحتاج تعمل بيات شتوى زى البرية ولا فى الشتا اسيبها عادى فى المية فى الحوض الزجاجى؟؟؟
حاجة تانية انا هجبلها سلحفاه تانية بس ذكر من نفس نوعها عشان يكبروا مع بعض ويلعبوا :) فهل ده عادى ولما ممكن يتخانقوا مع بعض مثلا؟
حاجة تانية انا شايفة ان البيئة اللى انا عملاهالها مش مناسبة خالص فمحتاجة مساعدة انا حجبلها حوض كبير بس احط فيه ايه مهم ليها؟ وانا سمعت ان الحبار ده مفيد عشان الكالسيوم طب لما اجيبه ارميهولها فى المية؟ طب ما هو هيسيح فى المية وهيروح معاها لانى بغير المية مرتين فى اليوم فاحطه فين؟ وهل لازم يكون فى رمل فى القاع؟ ولو حطيت رمل اغيره كل قد ايه؟ وهل لما اجى احطها فى الشمس احطها وهى جوة حوض المية ولا احطها فى علبة مثلا عشان تكون بعيدة عن المية؟؟
اسفة جدا على الاطالة بس دى اول مرة اربيها وعايزة اهتم بيها اوى لانها روح وربنا هيسالنى عنها ... شكرا واتمنى المساعدة . واتمنى انى اكون كتبت المشكلة فى المكان الصح لانى جديدة هنا فى المنتدى ... شكرا واعتذر عن الاسئلة الكتيرة بس اتمنى الرد عليهم
الإنتساب : 
العمر : 
المساهمات : 
نقاط التميز
الــدولـــة
عنوان المشاركة: محتاجة مساعدة لسلحفاتى المائية ذات الاذن الاحمراء
